Bangladesh-in PM hlui Hasina hmanna thupek ansua
15th April, 2025

Bangladesh court chun an ram prime minister hlui Sheikh Hasina, anaibung nu Sheikh Rehana baka Britain MP Tulip Rizwana nih mi dang 50-hei chu thuneina hmang dik loia, dik loi taka ram ineia antumna reka inzawmna neia  Pathianni han hmanna ding thupek ansua.

Dhaka Metropolitan senior special judge Zakik Hossian achun Anti-Corruption Commission (ACC)in chargesheet hrang inthumka a thelut  a ngaitua achang hnungin, Pathianni han arrest warrant hi ansua ta achang.

Judge Hossain chun hmanna thupek asua  inbawzui achang dan report chu April 27 a ngaitua dingin a ti sa.

April 10 han court hin Hasina, anai nu Saima Wazed Putul nih mi dang 17-hei chu dik loi taka ram neia intumna danga hmanna ding thupek aloi sua sa ta achang. Putul hi kum 2023 November 1 aṭang han New Delhi-a World Health Organisation (WHO) South East Asian regional director in a awm achang

ACC hin January 13 han Rehana hi thuneina hmang sual a, dik loi takan Purbachal New Town Projec hmangin 10-katha plot neia intumna laka thubuai a the lut a. Ma thila han Hasina nih Rehana nai nu, British MP Tulip Rizwana Siddiq hom inzelna neia intum achang sa. ACC hin asui chiang hnungin March 10 han mi 17 laka chargesheet an thelut nawk. Chargesheet inthumna chu ma ni den hin inthelut sap nawk achanga, mi 18 rihming tarlan achang nawk.

Sheikh Hasina hi prime minister aṭanga paithlak a chang hnungin, a laka lungawi loina inlangtir hei inthat tir nih, a manmasi pui hei laka pawikhawkna rapthlak tak atlunga intumna thubuai chu Bangladesh-a International Crimes Tribunal-a inthelut achang sa ta, Kum 16 zet a kaihruai, Awamani League in thuneina an chang hnung nikum August 5 han zirlai pawl kaihruaia nuar buatsaina nansafeka inlangtir achang hnungin PM aṭang hin paithlak achang. Hasina hi India rama arawt thaia, atuna riin a la awm achang. 

Source: Z.P Liana